de Màuru Piredda
 |
| Deretos Ekathimerini.com. Url imàgine |
Su parlamentu gregu at aprovadu unas cantas mesuras (chi pertocant pensiones e impostas reddituales) cuncordadas cun sos creditores internatzionales. Sas mènguas, chi nche crompent a 5,4 milliardos de èuros, a su chi narat su primu ministru Alexis Tsipras «no ant a tacare sas pensione printzipales». Sa ghia de Syriza at rispostu a sas crìticas de s'opositzione: «chie faeddat de una crèschida grae de s'impositzione fiscale, in su tempus coladu aiat aprovadu mesuras finas a 62 milliones». A su chi narant sos majorales de sa manca grega chi guvernat su paisu paret chi, nointamen sas dificultades, b'apat una re-distributzione a favore de sas classes populares. Ma a manca sas boghes non sunt totus che pare.
Sotiris Martalis, dirigente de su sindacadu Adedy e de su partidu Unidade populare, at naradu chi «a 190mìgia pessones lis ant a minimare sa pensione de 193 èuros su mese», chi «sa pensione mìnima si nch'at a torrare a 345 èuros» e chi «sos chi ant a andare in pensione a pustis de sa lege noa, l'ant a retzire reduida de su 30%». In contu de impostas b'at una crèschida de s'Iva de su 24% e una contratzione de sa fàscia de sos esentes: «At a èssere tassadu - at annantu Martalis - chie si siat balanget prus de 650 èuros su mese». In s'ìnteri creschent sas protestas sotziales peri sas pratzas gregas. Syriza at cundennadu sas violèntzias de sa politzia. Sos giòvanos de su partidu de Tsipras ant pedidu sa democratizatzione de su corpus. Ma s'àndala sighida no at assussegare sos ànimos, in ambas bandas de s'inserru.
