de Màuru Piredda
 |
| Deretos corriere.it. Url imàgine |
Sa data de su referendum in contu de trivellas est acurtziende·si. Is chi sighint ant a èssere dies in ue s'at a pòdere iscumproare si sa fatzenda “Tempa Rossa” at a èssere “de giudu” comente ddu est istadu su disacatu de Fukushima pro su cuesitu contra a su nucleare. Su ministru Federica Guidi (cun delega a s'Isvilupu econòmicu), a pustis chi is allegas telefònicas e is messageddos chi diant dèvere tzertificare unos cantos ligàmenes sunt essidos a campu, at disinnadu de si dimìtere. Ma ddoe at chie cheret de prus pedende sa conca de Maria Elena Boschi, ministru de is Raportos cun su parlamentu e mentovada in una de is allegas tzitadas.
Is giornales de oe sighint a nos contare sa chistione finamentas cun unas cantas intervistas. Debora Serracchiani, segretària vicària de su Pd, in su Corriere at allegadu de «iscoberta de sa'abba caente» ca su progetu est betzu de 27 annos (su giatzimentu lucanu dd'ant agatadu in su 1989). Ma su faeddu crae de sa narratzione abarrat “lobby”, grupu de pressione. Pro sa nùmeru 2 de su partidu de Renzi «feti in Itàlia impreamus su tèrmine in manera tragallosa». De prus: «est cosa normale a oviare sotziedades e batidores de interessos».
Finamentas su ministru Boschi, intervistadu dae La Stampa, at naradu chi «cada setore chi ponet a cùrrere postos de traballu tenet is lobby suas» e chi interessos ddoe nd'at «a inghìriu de is òperas pùblicas».
Duncas est totu in règula, narant. Ma, tando, ite sunt custas lobby? Torrende a Serracchiani est pretzisu a sighire ite àteru at naradu: «Siamus craros. Si Coldiretti ti pedit s'òbligu de s'etichetadura, cun custos lobbistas ddoe podimus chistionare o no?». Issa narat chi est bastante a ddoe àere «trasparèntzia». Ma Coldiretti, a si reconnoschet in sa categoria de lobby? Pro s'ex presidente de s'assòtziu, Sergio Marini, «sa lobby est una forma de pressione chi rapresentat petzi s'interessu particulare e chi, pro custu motivu, non diat dèvere interlocuire cun is istitutziones. Is lobby “a s'italiana”, a su paisu dd'ant fatu su male chi bastat pro no èssere legitimadas de cale si siat manera».
Paret tando chi, in antis de nàrrere ite est una lobby o ite no est, est pretzisu a disinnare ite est s'interessu generale, e a lu partzire dae su chi est particulare. Su de sa Total ite fiat?
