Sa Regione ponet a disponimentu su 9% de s'ispesa sanitària pro curare su diabete. Pagu prus o mancu 290 milliones de èuros. Su grupu de chirca Ceis-eehta, de s'Universidade Tor Vergata de Roma, in un'addòbiu in Casteddu, at presentadu un'istùdiu interessante. Sa chirca ammustrat chi su sistema regionale de sa salude diat pòdere risparmiare fintzas a 25 milliones de èuro raddopiende sos esames de s'emoglobina glicada e aumentende su controllu de sos àteros paràmetros comente su colesterolo.
A prevènnere sas cumplicàntzias de su diabete est de importu mannu. S'ipertensione, s'insufitzièntzia renale e sos istorbos a sos ogros sunt cunseguèntzias difùndidas meda. S'istùdiu bogat a campu chi su 50% de sos 85mìgia diabèticos patit fintzas àteras patologias chi contribuint a peorare su costu sòtzio-sanitàriu de sa maladia.
«Su diabete est intre sas patologias primàrgias de sa programmatzione regionale sanitària – at naradu su diretore generale de s'assessoradu de sa Salude, Zosepe Maria Sechi – punnamus a uniformare sa preventzione, sa diàgnosi primidia e sa cura de su diabete in su territòriu».
Sa rete diabetològica at a èssere ismanniada, ma s'istrutura atuale est giai de calidade bona e difusa in totu su s'ìsula.
