de Màuru Piredda
 |
| Imàgine pigada dae www.regione.sardegna.it |
«Custas, in su tempus coladu, fiant terras galanas meda, a tretu de ofèrrere una produtzione agrìcula e agro-alimentare de primore. Posca, una polìtica pagu capatze a favorèssere s'isvilupu issoro, ddas at abandonadas pro deghènnios. Ma oe pro Surigheddu e Mamuntanas comintzat un'istòria noa». Est su chi at naradu su presidente de sa Giunta regionale, Fratziscu Pìgliaru, in sa presentada de su progetu ammaniadu pro bèndere 1.200 ètaros de is terras mentovadas (in is chirros de S'Alighera) a is privados. In pare cun is terrinos ddoe at una barantina de fràigos e 8 silos pro su laore. A pustis de bintibator meses de guvernu, Pìgliaru ponet acabbu a trinta annos de propiedade regionale definida fallimentare. «Tenimus bisòngiu de imprendidores sèrios», at annantu su guvernadore.
S'idea est de nche pònnere totu cantu - pro mèdiu de unu bandu internatzionale - in is manos de unu privadu. «Pro nois - gasi s'assessore de is Entes locales Cristianu Erriu -
custas aziendas depent abarrare aunidas ca semus chistionende de una
realidade ùnica cun grandu potentzialidades in contu de atziones
sinèrgicas: pensamus a una rotatzione de s'impreu de is terrinos e de is
immòbiles finamentas pro finalidades turìsticas e ricreativas». Sa
Giunta de is professores connoschet is mecanismos de su mercadu odiernu.
Ischint chi su contigheddu tituladu "minoreddu est galanu", est feti
unu contigheddu. Ischit, duncas, chi pro cumpètere in su mercadu
mundiale, ddoe bolet una grandu cuntzentratzione de capitale. E,
liberistas comente sunt (nointamen sa gioventude "lottacontinuista" de
su presidente), is professores nos contant chi petzi su "privadu est
galanu".
Ma sa Regione depet privatizare a mala bògia?
S'Istatutu, a su de bator artìculos, narat chi si podet finamentas
espropiare pro pùblica utilidade (bastis chi is òperas non nche siant in
intro de is cumpetèntzias istatales). Duncas, una propiedade pùblica e
una gestione dereta dae banda de is traballadores est possìbile o nono?
Àtera chistione de nche pònnere in sa mesa est custa: ddoe est sa
netzessidade de «produtziones de calidade a tales chi si potzat cumpètere in is mercados»
o ddoe est sa netzessidade de torrare a conchistare su mercadu internu a
dae chi su bonu de is produtos chi mandigamus est importadu dae aterue?
Pregontas prus chi non lìtzitas.
