de Lisandru Beccu
 |
| Deretos Global project. Url imàgine |
Dae
su mese de cabudanni de su 2015, in mèdia, sunt mortos duos pitzinnos
cada die. Criaduras chi, in pare cun sas famìlias issoro, ant chircadu
de nche barigare su Mediterràneu de levante, pro agatare sorte bona in
Europa. S'Oim, s'Unhcr e s'Unicef ant cunfirmadu chi su nùmeru est
sighende a crèschere.
Aylan
Kurdi fiat petzi unu de sos 340 pitzinnos innotzentes chi, dae chimbe
meses a oe, si nche sunt andados, imbèrghidos dae su mare. «Non nos
podimus furriare a s'àtera ala cando semus cara a custas disauras,
devimus dare rispostas dèghidas chi permitant a custa gente de
cuntrastare sos perìgulos». Paràulas de su diretore esecutivu de s'Unicef Anthony Lake, chi sighit narende chi - «Pro
como non bi resessimus a firmare custu disisperu, nois nono. Sunt sos
istados sos chi si devent mòvere, cooperende intre issos e garantende
seguresa a chie biàgiat in mare».
Su
mare Egeu est su prus perigulosu, mescamente in ierru cando est belle
semper arrennegadu. Una barriera mortale pro totu sos disisperados chi,
cun barchitas de nudda e càrrigas fintzas a cùcuru si diant chèrrere
lassare sa gherra in palas.
Sos
pitzinnos rapresentant su 36% de sas pessones chi traessant s'abba e,
in sos ùrtimos meses, sos movimentos intre Turchia e Grètzia sunt
aumentados. In sas primas ses chidas de su 2016, sos emigrantes chi nche
sunt colados a s'àtera ala de s'inferru fiant 80.000. Sos mortos,
imbetzes, sunt 410. Datu chi cunfirmat un'aumentu de 35 bortas cunforma a
s'annu coladu.
Sas paràulas de William Lacy Swing, diretore generale de s'Oim, sunt sicas e deretas - «Tocat
de si pinnigare sas mànigas. Semus conca a sa disaura umana prus manna e
bi cheret s'agiudu de totu su mundu. Su terremotu de Haiti in su 2010
non pertocaiat petzi s'emisferu setentrionale e gasi etotu su tsunami in Àsia de su 2004». - E a ùrtimu serrat faghende un'apellu a s'unidade e a sa solidariedade - «In cussas ocasiones nos semus àpidos cara a una risposta umanitària de non crèere. Fintzas como nd'amus bisòngiu».
