 |
| Deretos Títeres desde abajo. Url imàgine |
Nch'at coladu carchi die dae cando a
Alfonso Lázaro de la Torre e a Raúl García Pérez, duos marioneteris,
nche ddos ant postos in intro a pustis de una rapresentatzione teatrale
in Madrid. Is "Títeres desde abajo" si sunt esibidos cun un'òpera
satìrica, "La bruja y don Cristóbal", insertada in su calendàriu de su
carrasegare. Ddoe at àpidu carchi protesta a dae chi in su pùblicu ddoe
aiat finamentas pipios. Ma, comente bidimus in su situ issoro, sa
"bruja" non faghet parte de is "Espectáculos infantiles". Sa cajone de
s'impresonamentu est istada s'iscrita "GORA ALKA-ETA" in unu cartellu
chi, in s'òpera, unu politziotu nche ponet subra de su corpus de una
fèmina. Comente a bòlere ammustrare is manùgias giuditziàrias contra a
is movimentos sotziales. "Alkaeta",
in bascu, bolet nàrrere sìndiga. Impreende "Alka-eta", is marioneteris
ant ironizadu subra de sa dereta chi cunsiderat perigulosas is Giuntas
comunales ghiadas dae sa manca de Podemos e Izquierda unida.
A su chi narat sa Cnt, s'organizatzione sindacale de unu de is duos "titiriteros", «s'istria
rapresentat is pessones male famadas cara a is bator poderios chi
guvernant sa sotziedade, est a nàrrere sa propiedade, sa religione, sa
fortza de s'istadu e sa lege». Ma pro is autoridades ispanniolas sa
de is marioneteris, cun sa frase incriminada, fiat un'impuntza a su
terrorismu. S'impresonamentu dd'at disinnadu su magistradu de
s'Audiencia nacional Ismael Moreno Chamarro, ispetore de politzia dae su
1974 - suta Francisco Franco - a s'83. Lázaro de la Torre e García
Pérez sunt isetende su giudìtziu. In s'ìnteri ddoe at mobilitatzione
manna in is carreras e in is retes sotziales. Alberto Garzon de
Iu e Pablo Iglesias de Podemos no ant retènnidu chi ddoe
esserent sos estremos pro sa presonia e pedidu ant sa libertade lestra
pro is duos artistas.
