 |
| Deretos Paginegialle, Url imàgine |
Sa miopia pagu prus o mancu l'ischimus totus ite cosa est. Unu difetu de rifratzione in ue sos rajos luminosos chi arribant dae una figura a tesu non resessent a si focalizare in sa rètina, ma in dae in antis de issa matessi. In custa manera sas figuras resurtant isfocadas e sa bisura megiorat petzi acurtziende·si·nche a su chi semus abbaidende.
In sos ùrtimos 50 annos sos pitzinnos cun problemas a sa vista sunt raddopiados. Sos chircadores de s'Ulster University ant dimustradu chi a tènnere unu genitore mìope aumentant de tres bortas sas probabilidades chi sos fìgios apant su matessi problema. Si sas ullieras las giughent ambos sos genitores, imbetzes, s'arriscu nche pigat de sete bortas.
S'istùdiu nch'at collidu sos datos de prus de milli pitzinnos dae sos ses annos in susu. Difatis, pro sòlitu, su difetu visivu si manifestat intre sos ses e sos trèighi annos.
Sos chircadores ant naradu chi sa preventzione est su caminu chi diat tocare a praticare. “Custos resurtados nos faghent cumprèndere comente si sunt isvilupende sos ogros de sos pitzinnos – at naradu sa chircadora Kathryn Saunders – sos genitores podent fàghere meda cun un'informatzione dèghida, agiuende in custa manera a rallentare sa difusione de sa miopia in sos giòvanos.
