 |
| Deretos ibtimes.com, Url imàgine |
Semus a pagu prus o mancu 100 chilòmetros dae Baghdad, sa capitale. Sos militares de su guvernu irachenu ant cumintzadu a inghiriare a Ramadi, tzitade controllada dae su califadu dae prus de ses meses. Carchi bighinadu, sos òmines de de su guvernu federale, bi l'ant pitzigada a nche lu conchistare, mescamente dae su ladus de ponente. Su tzentru, imbetzes, est blindadu, tancadu, nieddu, su matessi colore de sas banderas de s'istadu islàmicu, sas chi bèntulant in su cùcuru de unos cantos palatzos.
Sunt abarrados in pagos. A su chi narant sos investigadores irachenos, diant èssere unos 300, inserrados, debilitados e sena recatu. Fintzas sas armas sunt minimende. Su mese coladu, un'atacu nche lis aiat truncadu sos rifornimentos. S'esèrtzitu de Baghdad sas dies coladas at bombardadu paritzos apostamentos de sos jihadistas, cajonende·lis dannos graes e mortos. Sos datos ufitziales non sunt galu a disponimentu.
In s'ìnteri, sos peshmerga sunt operende in sa provìntzia de Nìnive, in sos tretos de Mosul. Fintzas inoghe sos militzianos de Daesh nch'ant pèrdidu petzos e fortza, impressados e assachiados dae sos curdos. 13 sos mortos. Fintzas su Pentàgonu at naradu chi at fatu sa parte sua. Mèrcuris, nessi 180 estremistas sunt mortos in sas iscurreras de sa coalitzione internatzionale. Sa cursa a chie nde ochiet de prus sighit.
