 |
| Su brusiadore de Tòssilo |
Sa noa est reghente. Su guvernu italianu, tràmite decretu chi interessat oto regiones, bolet fraigare noe brusiadores de arga. Fiant 12 a comintzu. Dêt èssere istadu su resurtu de su Cop20, est a nàrrere s'acordu de Parigi, a ddis fàghere mudare idea a is guvernantes nostros. Ma sa noa a nois prus serente est chi non si nch'escluet sa possibilidade de un'àteru brusiadore in Sardigna. Su de tres. Forsis in Portu Turre.
Ca sa regorta diferentziada de s'arga nch'est galu a tesu dae s'obietivu de su 65% e ca is discàrrigas nche sunt belle cròmpidas a su lìmite. Nât chi. Tocat de cumprèndere comente s'at a mòvere sa Regione (finas cunsiderende chi non ddoe at prus fundos europeos pro sa re-istruturatzione de su de Tòssilo).
Ma, mescamente, tocat de cumprèndere comente siat possìbile a si lamentare de pertzentuales bassas de diferentziada si unu brusiadore totu bolet francu una diferentziada chi funtzionet a beru. E tocat de cumprèndere comente si nche potzant menguare is livellos de emissiones sena una produtzione chi no est ratzionale, chi est arga pro su prus.
Chie produit, cando, comente, in ue e pro ite. Custas sunt is pregontas pro àere is rispostas chi ddoe deghent. O nono?
