 |
| Casteddu. Deretos lìberos. Url imàgine |
Su 9 de nadale su Consìgiu
regionale at a votare in àula sa riforma de is entes locales proposta
dae sa Giunta Pìgliaru e aprovada dae sa commissione preposta su 26 de
custu mese. Is votatziones, chi ant registradu una majoria mìnima de
consigeris favorèvoles (4-3), ant partzidu su Pd.
In
intro de custu partidu ddoe at àpidu orientamentos diferentes. Robertu
Deriu (reladore de majoria) e Sarvadore Demontis ant naradu chi emmo. Ma
s'ex Psd'Az, ex Margherita e ex Rossomori, mancari contràriu a s'ùnicu
tretu metropolitanu casteddaju, at ammìtidu de àere votadu aici «pro sarvare sa legisladura»; Zosepe Meloni, gadduresu, at naradu imbetzes chi nono ca «sa Gaddura in antis de totu».
In
cada manera su tzentru-manca depet reconnòschere chi sa proposta
nch'est colada in commissione ca mancaiat su consigeri de Forza Italia
(contràriu) Istèvene Tunis.
Contrariedade
finamentas dae unos dughentos sìndigos imbènnidos eris in Nùgoro.
Presentes, intre is chi ghiant is tzentros prus mannos, Nigola Sanna
(Tàtari), Giuanne Giovannelli (Terranoa), Andria Biancareddu (Tèmpiu),
Francu Cuccureddu (Casteddu Sardu) e su mere de domo Andria Soddu.
Pro
custos bi diant bòler duos tretos metropolitanos. Una proposta chi
paret assimigiare a sa partzidura istòrica de sa Sardigna in cabu de
susu e cabu de giosso: «su tretu nord - at naradu Giovannelli - cun Tàtari, Gaddura, Ogiastra e Nuoresu; su tretu sud cun Casteddu, Sulcis, Campidanu de mesu e Oristanesu».
Pro Cuccureddu a nd'àere unu ebbia est comente a cundennare 360 comunas sardas: «S'ant a sarvare petzi is chi ant a fàghere parte de sa tzitade metropolitana de Casteddu».
Is sìndigos contràrios ant minetzadu de «martzare in Casteddu» s'in casu sa Giunta non retiret sa proposta.
