 |
| Deretos Cup. Url imàgine |
A duos meses dae is votatziones autonòmicas, sa Cup (Candidadura de
unidade populare) at cunfirmadu su nono suo a s'investidura de Artur Mas
comente presidente de sa Generalitat. Est su chi at disinnadu sa base
de su movimentu indipendentista de manca chi s'est imbènnida oe in
Manresa.
Sa Cup nch'est cròmpida dae 3 a 10 sègios divenende
una fortza determinante pro cale si siat sèberu de importu conca a sa
prospetiva de sa repùblica catalana. Su 9 de onniasantu aiat votadu chi
emmo a sa risolutzione chi aberiat su protzessu de indipendèntzia dae
s'istadu ispanniolu.
Ma a su matessi tempus at sighidu a cuntrastare sa
candidadura de sa ghia de Cunvergèntzia democràtica. Pro sa Cup, Junts
pel sì (est a nàrrere Cdc in pare cun is natzionalistas de manca de Erc)
depet propònnere unu candidadu alternativu pro chi si nche potzat
cròmpere a unu protzessu costituente e a unas cantas mesuras sotziales.
Ma est possìbile chi Mas e sa coalitzione sua su passu a dae in segus
non ddu fatzant. E custu bolet nàrrere eletziones noas. Is militantes de
base de sa Cup s'ant a torrare a addobiare a pustis de is eletziones
generales ispanniolas.
