de Màuru Piredda
 |
| Deretos Fatih Pinar, Afp/Getty Images |
Non nch'at coladu tempus meda dae cando una
bomba tzocheit durante unu comìtziu de s'Hdp filocurdu in Diyarbakir, sa
capitale de su Kurdistan turcu, ochiende bator pessones. Mancaiant tres
dies a is eletziones de su 7 de làmpadas. Imoe in Turchia, su primu de
onniasantu, s'at a torrare a votare a pustis chi su partidu de Erdoğan
(s'Akp) at pèrdidu sa majoria sena renèssere a formare unu guvernu de
coalitzione. E finamentas pro custa campagna eletorale calicunu at
disinnadu chi sa mùsica non devet mudare.
Eris, difatis, ddoe at àpidu
duas esplosiones mannas in intro de sa martza pro sa paghe organizada in
Ànkara dae sa manca polìtica, sindacale e sotziale turca e filocurda. Is autoridades turcas, deretas, ant faeddadu de atacu terrorìsticu pighende in cunsideru s'ipòtesi de is atentados suitzidas. «Atacu odiosu contra a s'unidade e a sa paghe de su paisu», at naradu Erdoğan. Ma pro Selahattin Demirtas, sa ghia s'Hdp «semus cara a un'istadu assassinu».
Su slogan de sa martza de eris fiat “Traballu, paghe e democratzia”
e is manifestantes fiant pedende a su guvernu chi agabbaret is
bombardamentos de is postatziones de su Pkk. Castiende su vìdeu si podet
bìdere chi sa dinàmica est sa matessi de cando, su 20 de argiolas,
un'eplosione interesseit una tropa de giòvanos turcos e curdos chi dae
Suruc fiant movende conca a Kobane, sa tzitade kurda siriana destruida
dae sa barbàrie de s'Istadu islàmicu.
