de Màuru Piredda
 |
| Elaboratzione gràfica sa gazeta |
Semper de bator provìntzias sunt chistionende,
in Regione, ma imoe ddoe at una novidade: sa provìntzia tirrènica chi
diat dèvere aunire Gaddura, Nùoro e Ogiastra. A banda, tando, sa
possibilidade de nche ddas pònnere a banda, is provìntzias, e a banda
finamentas sa torrada a sa cuadripartzidura istòrica cun Tàtari,
Aristanis, Nùgoro e Casteddu.
Si nd'at a chistionare dae cras, cando
s'ant a oviare is membros de sa commissione Riformas chi sunt
traballende pro presentare sa lege in Consìgiu su mese ch'intrat. Sa
proposta de sa provìntzia tirrènica noa noa no est. Dae tempus est
pigada in cunsideru dae su consigeri de su Pd (giai presidente de sa
provìntzia nugoresa e de s'Unione de is provìntzias sardas) Roberto
Deriu contra a su podèriu mannu de Casteddu e Tàtari. A favore de sa
proposta sa netzessidade de individuare unu tretu econòmicu, polìticu e
produtivu pro cuntratare mègius cun sa Regione. Ma finas, nât chi,
resones istòricas chi nche diant dèvere barigare is làcanas atuales. Sa
provìntzia tirrènica agradat fintzas a su presidente de sa commissione
Frantziscu Agus (Sel). Novidades finamentas in su cabu meridionale: sa
provìntzia de su sud non diat dèvere currispòndere a s'àrea
metropolitana de Casteddu prevìdida dae sa segunda botza. Imoe s'àera
s'at a limitare a unas cantas comunas: Ceraxius, Cuartu Sant'Aleni,
Assèmini, Su Masu, Cabuderra e Sestu.
